Nagpalihok na og mga lakang sa pagpangandam ang National Irrigation Administration (NIA) aron masumpo ang posibleng epekto sa El Niño nga gilaoman nga motungha ug molig-on sa ulahing bahin sa tuig 2026.
Sumala sa NIA, gilunsad na nila ang mga estratehiya sa husto nga pagdumala sa tubig, lakip ang mas organisadong iskedyul sa pagpagawas sa tubig gikan sa mga dam, rotational water distribution, rehabilitasyon sa mga dam ug irigasyon, desilting sa mga kanal, ug pagpalapad sa paggamit sa solar-powered irrigation systems.
Gidasig usab sa ahensya ang mga mag-uuma sa pag-adjust sa ilang kalendaryo sa pagtanom aron malikayan ang dakong epekto sa taas nga panahon sa hulaw ug mapadayon ang produksyon sa pagkaon.
Nagpadayon usab ang koordinasyon sa NIA uban sa mga lokal nga panggamhanan, irrigators’ associations, ug uban pang mga ahensya aron mapalig-on ang kahimtang sa irigasyon ug masiguro ang igo nga suplay sa tubig alang sa sektor sa agrikultura atol sa posibleng El Niño.
Photo Courtesy: Philippine News Agency
