Gihingusgan ni Lanao del Sur Representative Zia Alonto Adiong nga ang tanang Pilipino adunay katungod nga mahibal-an ang tinuod nga identidad ni Mary Grace Piattos, usa sa giingong nakadawat og confidential funds gikan sa Office of the Vice President (OVP).
Sa usa ka online press briefing, gipasabot ni Adiong nga importante nga mapamatud-an kung tinuod ba o dili ang maong persona tungod kay ang confidential funds gikan sa buhis sa katawhan. Matud niya, walay rekord nga nakit-an ang daghang ahensya sa gobyerno nga nagpakita nga adunay tawo nga adunay maong ngalan.
Dugang pa ni Adiong, ang korte lamang ang makatabang sa pag-establisar kon naglungtad ba gyud si Piattos. Giduso usab niya ang argumento nga codename lamang ang “Mary Grace Piattos,” nga nag-ingon nga bisan pa man og alias kini, kinahanglan gihapon nga adunay tinuod nga identidad nga gisumite sa Commission on Audit (COA) alang sa hustong pag-audit sa confidential funds.
Matud sa Magbabalaod, ang kakulang sa maong dokumentasyon maoy usa sa mga hinungdan nganong gi-flag ug gidisallow sa COA ang pipila ka confidential fund expenditures sa OVP.
Si Mary Grace Piattos usa sa mga saksi nga gustong ipatawag sa prosecution panel sa impeachment trial ni Vice President Sara Duterte aron motestigo bahin sa giingong pagdawat sa confidential funds.
