Gipasiugdahan ni CDO Division Schools Division Superintendent Dr. Roy Gazo nga ang kaluwasan sa mga estudyante dili lamang limitado sa pisikal nga kahimtang sulod sa tulunghaan, kondili naglakip usab sa ilang mga kalihokan sa digital nga kalibutan.
Kini ang unod sa mensahe ni Dr. Gazo atol sa opisyal nga paglunsad sa “Swipe Safe Project” niadtong Huwebes, Hunyo 25.
Sumala ni Dr. Gazo, dako ang mamahimong epekto sa panghunahuna ug pamatasan sa kabatan-onan sa mga hagit online sama sa online bullying, pagkaylap sa sayop nga impormasyon, ug digital exploitation.
Tungod niini, iyang gipatin-aw nga dinalian ug importante ang pagpalambo sa digital citizenship, responsableng paggamit sa teknolohiya, ug husto nga kahibalo sa pagpanalipod sa kabataan batok sa mga risgo sa internet.
Hugot sab nga giawhag sa opisyal ang mga ginikanan, magtutudlo, ug mga kaabag sa komunidad nga magtinabangay.
Matud niya, pinaagi lamang sa panaghiusa masiguro nga ang matag estudyante sa Cagayan de Oro makakat-on sa usa ka luwas, malinawon, ug mapanalipdan nga palibot — sulod man sa eskwelahan o sa mga online nga luna.
Ang Swipe Safe Project gilauman nga magsilbing dalan aron mas mapalig-on ang adbokasiya alang sa kaayohan ug proteksyon sa mga magtutungha sa tibuok dakbayan.
Photo courtesy: Cagayan de Oro City Information Office
