Gipasabot sa Cagayan de Oro Water District (COWD) nga daghan na silang gihimo nga mga lakang aron lang mapalambo ang ilahang serbisyo labi pa nga mukabat na sa 53 katuig ang ilahang mga pipelines.
Pagpasabot ni Engr Nieva Ladera-Assistant General Manager, COWD Technical Services atol sa usa ka public hearing nga tungod sa kadugayon na sa ilahang mga tubo, dili malikayan nga daghan na sab ang gikinahanglang repairs ug maintenance.
Matud pa ni Engr Ladera, aron nga padayon ang serbisyo sa tubig, lakip sa ilahang ginaatiman ang mag-develop og dugang water source, pag-install og dugang mga tubo o metro, pag-ayo sa service connection, pagpalig-on sa support facilities ug uban pa.
Kining tanan nagkinahanglan og dakong kantidad sa kwarta apan ning kasamtangan, dili na makasapar ang financial capacity sa COWD ug tungod wala pay increase sa ilahang water rate ug wala sab sila naga-agad og financial aid gikan sa gobyerno, usa sa ilahang nakitang pamaagi ang pagpangutang sa banko.
Nanghinaot gihapon ang COWD og suporta ngadto sa mga konsumante alang sa ilahang gihangyo nga water rate adjustments.
Photo courtesy: Cagayan de Oro City Water District/PNA
