Gisunog sa mga awtoridad sa Myanmar ang kapin 50 ka tonelada sa nagkalain-laing matang sa iligal nga droga nga adunay gibanabanang kantidad nga kapin 600 milyong dolyar o halos 34 bilyong pesos. Ang operasyon gihimo isip kabahin sa pagtimaan sa International Day Against Drug Abuse and Illicit Trafficking.
Makita ang dagkong aso nga mibutho sa kahanginan sa gawas sa Yangon, diin gilakip sa gisunog nga mga droga ang heroin, opium, methamphetamine, ketamine, marijuana, ug crystal meth. Sumala sa kapolisan, kapin 321 milyong dolyar nga kantidad sa mga droga ang gisunog sa Yangon lamang.
Ang Myanmar dugay nang giila isip usa sa mga dagkong tinubdan sa iligal nga droga sa Asya. Matud sa mga eksperto, misaka pa ang produksiyon sa droga sukad sa military takeover niadtong 2021 nga misangpot sa nagpadayon nga giyera sibil sa nasod.
Niadtong Enero, giangkon sa militar nga gobyerno nga ilang nakumpiska ang pinakadakong kantidad sa iligal nga droga ug kagamitan sa paghimo niini sa kasaysayan sa Myanmar human sa serye sa mga operasyon sa Shan State.
Samtang, giingon sa gobyerno nga ang pipila ka armadong grupo ug militias naggamit sa kita gikan sa iligal nga droga aron pondohan ang ilang mga kalihokan batok sa militar. Apan adunay usab mga grupong etniko nga nagpatuman sa kaugalingong kampanya batok sa droga.
Ang pagsunog sa maong mga kontrabando giisip nga simbolo sa padayon nga pakigbatok sa Myanmar batok sa iligal nga pagbaligya ug paghimo sa droga, bisan pa sa nagpadayon nga kagubot ug panagbangi sa nasod.
Photo courtesy: The Washington Post
