Gipasidaan sa S&P Global Ratings nga ang Pilipinas usa sa walo ka emerging market economies nga mahimong makasinati sa grabeng epekto sa El Niño, nga posibleng makaapekto sa suplay sa tubig ug kuryente, ingon man sa produksyon sa humay ug mais.
Sa ilang report, giingon sa S&P nga ang kakulang sa ulan mahimong hinungdan sa hulaw nga makadaot sa agrikultura ug hydropower generation. Ang Pilipinas giila nga usa sa mga nasod nga “highly exposed” sa mga risgo nga dala sa maong weather phenomenon, kauban ang Thailand, India, Vietnam, Indonesia, Peru, South Africa, ug Colombia.
Matud pa sa S&P, ang posibleng epekto sa El Niño mahimong mopadugang sa inflationary pressures nga nasinati na tungod sa tensyon ug kagubot sa Middle East. Tungod niini, nagpadayon ang Bangko Sentral ng Pilipinas sa paghugot sa monetary policy aron mapugngan ang pagsaka sa presyo sa mga batakang palaliton.
Bag-o lang usab gipataas sa BSP ang policy interest rate ngadto sa 4.75 porsyento, ikaduhang sunod nga rate hike, aron matubag ang padayon nga presyur sa inflation.
Samtang, gipakubos sa S&P ang economic growth forecast sa Pilipinas alang sa 2026 ngadto sa 4.1 porsyento gikan sa 5.8 porsyento. Giingon niini nga ang epekto sa gubat sa Middle East ug mga risgo sa klima maoy naghatag og dakong hagit sa ekonomiya sa nasod.
Bisan pa niini, nagpatuman ang gobyerno ug BSP og mga relief measures, lakip ang paghatag og grace period sa pagbayad sa mga utang sa mga sektor nga maapektuhan sa mga kalamidad ug krisis sa ekonomiya.
Photo courtesy: Philippine News Agency
