Gipahibalo nga postponed sa pagkakaron ang proseso sa gipaabot nga rematch tali ni kanhing eight-division world champion Manny Pacquiao ug undefeated American boxer Floyd Mayweather Jr. tungod sa legal nga mga isyu nga giatubang ni Mayweather.
Sumala sa beteranong boxing reporter nga si Lance Pugmire, si Pacquiao mismo maoy mikompirma nga dili ma dayon ang away nga una nang gikatakdang ipahigayon sa Septiyembre 25 ug gilauman untang ipagawas pinaagi sa Netflix.
Ang pagkalangan sa rematch nalangkob sa breach of contract lawsuit nga gisang-at batok kang Mayweather sa CSI Sports Events. Giakusahan ang Amerikano nga boksidor sa paglapas sa kontrata human siya misugot sa laing exhibition fight sa Greece, bisan adunay kasabutan na alang sa exhibition bout batok kang Mike Tyson ug sa posibleng duwa nila ni Pacquiao.
Matud pa sa mga report, kung masulbad ang panaglalis tali ni Mayweather ug sa CSI Sports Events, mahimong matuman una ang away nila ni Tyson sa Septiyembre 12, nga mahimong mopuli sa iskedyul sa Pacquiao-Mayweather rematch.
Ang maong rematch dugay nang gihulat sa mga boxing fans sukad kini unang gipahibalo niadtong Pebrero. Apan nagkalain-laing mga isyu ug pahayag gikan sa duha ka kampo ang hinungdan sa padayon nga kalibog sa kahimtang sa maong blockbuster fight.
Photo courtesy: Philippine News Agency
