Nagpadayon ang PhilHealth Caraga sa pagpalig-on sa programa sa gobyerno nga Universal Health Care pinaagi sa paspas nga pagpagawas sa bayad ngadto sa mga ospital ug ubang healthcare facilities sa rehiyon.
Base sa datos, miabot sa P483.64 milyon ang gipagawas sa PhilHealth Caraga niadtong Mayo aron mabayran ang 39,143 ka claims nga naproseso gikan sa lainlaing healthcare facilities.
Gawas niini, nakab-ot usab sa PhilHealth Caraga ang 6.04 ka adlaw nga average turnaround time sa pagproseso sa claims. Mas paspas kini kumpara sa 10.13 ka adlaw nga national average sa tibuok nasud.
Sumala sa PhilHealth Caraga, nagpasalamat sila sa padayon nga pakigtambayayong sa mga ospital ug healthcare providers aron masiguro nga ang matag Caraganon makadawat og dali, kasaligan, ug episyenteng benepisyo sa medikal pinaagi sa PhilHealth.
Sa Abril usab ning tuiga, nakarekord ang PhilHealth Caraga og 6.5 ka adlaw nga turnaround sa pagproseso sa claims, nga mas maayo gihapon kaysa sa 11.12 ka adlaw nga national average.
Niadtong Abril, nakapagawas usab ang ahensya og P557.40 milyon nga bayad alang sa 43,233 ka claims gikan sa mga healthcare facilities sa rehiyon.
Photo courtesy: PhilHealth-13
