Nasikop ang usa ka 28-anyos nga lalaki human mapalitan sa gidudahang shabu atol sa buy-bust operation nga gihimo sa kapolisan sa Purok 3, Barangay San Pedro, Cantilan, Surigao del Sur sayo sa kaadlawon niadtong Biyernes, Hunyo 26.
Giila sa Cantilan Drug Enforcement Unit (DEU) ang nadakpan pinaagi sa alyas nga “Boy,” usa ka ulitawo ug residente sa Purok 4, Barangay Linintian sa maong lungsod.
Sumala sa kapolisan, gilusad ang operasyon sa alas 12:10 sa kaadlawon pinaagi sa hiniusang pwersa sa Cantilan DEU ug Philippine Drug Enforcement Agency (PDEA) Regional Office XIII, ubos sa pagpanguna ni PCPT Jovie C. Alngog, Officer-in-Charge sa Cantilan Municipal Police Station.
Narekober gikan sa suspetsado ang gidudahang shabu nga adunay gibana-banang gibug-aton nga 1.3 gramos ug gibanabanaang balor nga P8,840.
Human sa pagdakop, gipahibalo ang suspetsado sa iyang mga katungod sumala sa balaod. Giandam na usab sa mga otoridad ang kaso batok kaniya tungod sa gituohang paglapas sa Section 5 o pagbaligya sa iligal nga droga ug Section 11 o pagpanag-iya sa iligal nga droga sa Republic Act No. 9165 o Comprehensive Dangerous Drugs Act of 2002.
Photo courtesy: PNP Cantilan Municipal Police Station
