Nipatuman og hugot nga pagbawal sa pag-inom og alkohol ang syudad sa Paris, sa nasod sa France isip tubag sa grabeng heatwave nga padayon nga nasinati sa maong syudad.
Matud ni Paris Police Prefect Patrice Faure, misaka ang gidaghanon sa mga gidala sa mga ospital tungod sa heatstroke ug ubang mga sakit nga may kalabutan sa grabeng kainit nga nasinati sa publiko.
Tungod niini, gidili una ang pag-inom og mga ilimnong makahubog sa mga kadalanan ug ubang pampublikong lugar, lakip na ang pagbaligya og alkohol nga dad-on o takeout.
Subay sa kamanduan, dili tugotan ang pag-inom og alkohol sa publiko gikan alas 12:00 sa udto matag Biyernes hangtod alas 7:00 sa buntag sa Sabado, ug usab gikan alas 12:00 sa udto sa Sabado hangtod alas 7:00 sa buntag sa Domingo.
Samtang gidili usab ang pagbaligya og takeout nga alkohol gikan alas 6:00 sa gabii matag Biyernes hangtod alas 7:00 sa buntag sa Sabado, ug gikan alas 6:00 sa gabii sa Sabado hangtod alas 7:00 sa buntag sa Domingo.
Sa laing bahin, gibutyag sa Paris Fire Brigade nga misaka usab ang ilang mga operasyon tungod sa sunog, nga niabot na sa kapin 2,500 ka mga insidente atol sa heatwave.
Photo courtesy: The New York Post
