Pabor ang DepEd Region 9 sa pag-review pag-usab sa Juvenile Justice and Welfare Act aron masuta kung ang mga probisyon niini angayan pa ba sa kasamtangang panahon.
Kini ang gipahayag ni DepEd Region 9 Regional Director Ronelo AL K. Firmo human sa bag-ohay nga insidente sa pagpamusil sa usa ka eskwelahan sa Tacloban City, diin nalambigit ang mga menor de edad nga giingong nakahimo og seryosong krimen.
Matud ni Firmo, importante nga masusi pag-usab ang balaod aron matubag ang mga hagit nga giatubang sa kabatan-onan karon.
Gidugang niya nga kinahanglan usab adunay mas klarong giya alang sa mga magtutudlo bahin sa sakop sa ilang pagdisiplina sa mga estudyante sulod sa classroom.
Gipasiugda usab sa Regional Director nga kinahanglan magpabiling balanse ang pagpanalipod sa katungod sa mga bata ug ang pagmintinar sa disiplina sa mga eskwelahan, aron masiguro ang usa ka luwas ug angay nga palibot alang kanila.
