Girekomendar sa Criminal Investigation and Detection Group (CIDG) og pagsaka og kasong paglapas sa Anti-Hazing Act batok sa mipahuway nang Ateneo head coach nga si Tab Baldwin ug 10 pa ka indibidwal may kalabotan sa team-building activity sa Aurora nga miresulta sa pagkamatay sa student-athletes nga sila Rene Baterbonia ug Divine Adili.
Sumala kang Interior Secretary Jonvic Remulla, ang giamyendahang Anti-Hazing Act dili lamang naglangkob sa initiation rites. Matud pa niya, ang maong team-building ug training activity milapas na sa depinisyon sa hazing tungod kay adunay mga kalihokan nga hinungdan sa pisikal o sikolohikal nga pag-antos sa mga partisipante.
Lakip sa mga giila sa balaod isip hazing ang pinugos nga ehersisyo ug pagpaantos pinaagi sa pagpa-expose sa lainlaing kahimtang sa panahon.
Sa laing bahin, giingon sa Ateneo de Manila University nga walay gibug-aton o weights nga gigamit atol sa conditioning exercise nga gihimo sa tuhod-kalawom nga tubig.
Photo Courtesy: psbalita.com
