Gipili na sa Philippine Sports Commission (PSC) ang mahimong lokasyon sa ilang “PSC House”, nga magsilbing opisyal nga headquarters alang sa 2028 Asian Beach Games nga dumalaon sa Cebu City.
Ang ocular inspection gipangunahan ni PSC Chairman Patrick “Pato” Gregorio, uban ni PSC Commissioner Edward Hayco didto sa South Road Properties sa Cebu City.
Kauban usab nila ang ubang opisyal sa sports ug mga miyembro sa Asian Beach Games Local Organizing Committee, diin ilang giinspeksyon ang posible nga mga pasilidad alang sa maong international competition.
Ang napiling lokasyon mao ang duha ka andana nga SRP Office Building, nga nahimutang tapad sa NUSTAR Resort and Casino sa northbound lane sa Cebu South Coastal Road.
Gilauman nga mahimong sentro sa daghang kompetisyon ang SRP atol sa Asian Beach Games, samtang ang ubang mga kalihokan ipahigayon usab sa mga bantugang baybayon sa amihanan ug habagatan sa lalawigan sa Sugbo.
Ang 2028 Asian Beach Games maoy usa sa pinakadakong international sporting events nga pagadumalahan sa Pilipinas sa umaabot nga mga tuig.
Photo Courtesy: CEBU CITY DAILY NEWS
