Usa ka lalaki gikan sa Australia ang nakab-ot ang talagsaong dungog human maila isip pinakakusog mosinggit sa tibuok kalibutan.
Ang maong lalaki mao si Joseph McGrail, nga opisyal nang natala sa Guinness World Records human makarekord og singgit nga miabot sa 122.4 decibels—kusog nga maikumpara sa tingog sa usa ka rock concert.
Sumala sa report, sukad pa sa 2017 nagserbisyo na si McGrail isip town crier sa Canberra, diin nailhan siya sa iyang kusog nga tingog. Niadtong 2022, giseryoso niya ang pag-apil sa mga kompetisyon sa pagsinggit, uban sa tabang sa iyang anak, hangtod nga nakab-ot niya ang world record.
Apan ang nakapatingala, dili diay siya kusog mosulti sa iyang pagkabata, gumikan kay usa siya ka maulawon ug hilumon nga bata.
Nadiskubrihan lamang ang iyang talagsaong abilidad sa dihang naapil siya sa teatro, diin gikinahanglan niyang mogamit og kusog nga tingog bisan walay mikropono.
Nagpakita lamang ang istorya ni McGrail nga usahay ang atong pinakadakong talento madiskubrihan lamang pinaagi sa pagpaningkamot, pagbansay, ug pagsulay sa bag-ong mga hagit.
Ang usa ka hilumon nga bata mahimong mahimong matala sa Guinness world kung dili mohunong sa pagtuo sa iyang kaugalingon.
Photo Courtesy: GUINNESS WORLD RECORD
