Gipahibalo sa Malacañang nga matag pamilya sa mga estudyanteng namatay sa nahitabong pagpamusil sa usa ka eskwelahan sa Tacloban City niadtong Hunyo 22 makadawat og ₱150,000 nga pinansyal nga ayuda gikan sa gobyerno.
Sumala ni Palace Press Officer nga si Claire Castro, ang matag pamilya sa mga biktima nga namatay hatagan og maong kantidad isip tabang sa ilang pag-atubang sa trahedya.
Sa inisyal nga imbestigasyon, nasayran nga ang duha ka suspek nga nag-edad og 14 ug 15 anyos maoy nagpabuto sulod sa mga classroom sa San Jose National High School, nga miresulta sa pagkamatay sa tulo ka estudyante ug pagkasamad sa 20 pa ka uban.
Gipadayag usab nga ang Department of Social Welfare and Development ug ang Department of Health maghatag og psychosocial services ngadto sa mga biktima ug sa ilang mga pamilya aron matabangan sila sa emosyonal ug mental nga epekto sa insidente.
Base sa imbestigasyon, gituohang nagsugod og plano ang mga suspek alang sa maong pag-atake sukad pa sa Abril o Mayo.
Duha ka babaye ug usa ka lalaki ang namatay sa insidente, samtang 15 ang naigo sa bala ug lima pa ang nasamdan human nilukso o nidagan aron makalingkawas sa insidente.
Gisusi usab sa mga otoridad ang report nga ang usa sa mga suspek adunay pagkaadik sa mobile game nga GoreBox, nga adunay hulagway sa grabeng kapintas ug paggamit og armas.
Samtang, nagpahayag og dakong kasubo si Pangulong Ferdinand R. Marcos Jr. sa nahitabo ug mimando og lawom ug hingpit nga imbestigasyon aron mahibal-an ang tinuod nga hinungdan sa maong trahedya.
Photo Courtesy: Philippine News Agency
