Gikasohan sa Chinese technology ug e-commerce giant nga Alibaba ang gobyerno sa Estados Unidos human kini maapil sa listahan sa mga kompanyang giingong adunay kalambigitan sa militar sa China.
Ang kaso gisang-at sa federal court sa California batok sa U.S. Department of Defense o Pentagon, nga midugang sa Alibaba sa blacklist sa mga gitawag nilang “Chinese military companies.”
Gisupak sa Alibaba ang maong desisyon ug giingong walay lig-on nga basihan ang alegasyon nga konektado sila sa industriya sa depensa sa China. Matud sa kompanya, ang ilang mga serbisyo gitumong alang sa retail, logistics, ug information technology, ug walay kalabotan sa armas o operasyon militar.
Gipangayo sa Alibaba nga tangtangon ang ilang ngalan sa blacklist, nga ilang giingong nakadaot na sa reputasyon ug relasyon sa kompanya sa mga negosyo sa Estados Unidos.
Sumala sa kasamtangang balaod sa U.S., dili na mahimong makakontrata ang Pentagon sa mga kompanyang naa sa maong listahan, ug sugod sa 2027 dili na usab makapalit sa ilang mga produkto o serbisyo pinaagi sa mga third party. Bisan pa niini, ang pag-apil sa blacklist wala pa magpasabot nga adunay opisyal nga silot o sanctions batok sa kompanya.
Photo Courtesy: South China Morning Post
