Mainitong gidawat sa lungsod sa Malitbog, Bukidnon ang mga delegado sa Miss Philippines Earth 2026 nga opisyal nang miabot alang sa Grand Coronation Night nga pagahimoon karong Hunyo 27, 2026.
Gisugat ang mga kandidata pinaagi sa usa ka makalingaw nga motorcade ug mainiton nga pagdawat gikan sa lokal nga komunidad. Ang maong kalihokan nagpakita sa suporta ug pag-abiabi sa mga lumulupyo sa mga delegado nga nagrepresentar sa lain-laing bahin sa nasud.
Human sa ilang pag-abot, nagtigom ang mga kandidata sa Cultural Center sa Malitbog diin sila nagpadayon sa ilang mga kalihokan isip kabahin sa kompetisyon.
Ang Miss Philippines Earth 2026 nagdala sa mensahe sa pag-atiman sa kalikupan, liderato, ug ang adbokasiyang “Love in Action,” nga gipasiugda sa matag delegado atol sa ilang panaw sa kompetisyon.
Samtang nagkaduol ang adlaw sa koronasyon, misamot usab ang kahinam sa mga residente ug mga tagasuporta nga nagpaabot sa pagpili sa sunod nga Miss Philippines Earth 2026 sa lungsod sa Malitbog.
Photo Courtesy: Malitbog Tourism
