Nagpahigayon ang Bangko Sentral ng Pilipinas (BSP) og usa ka Media Information Session alang sa mga practitioner, stakeholders, ug mga opisyal sa lokal nga kagamhanan sa Bukidnon kagahapon Hunyo 24, 2026. Ang maong kalihokan, nga nagsugod sa alas 8:00 sa buntag hangtod alas 12:00 sa udto, gipahigayon didto sa Roadhouse Courtyard and Grand Hall sa Patag, Bagontaas, Valencia City.
Nag-unang katuyoan sa maong panagtigom ang paghatag og dugang kaalam bahin sa financial health ug pagpalig-on sa kahibalo sa publiko batok sa nagkadaghang cyber threats ug online financial scams.
Atol sa programa, nagpresentar ang mga opisyal sa BSP og mga diskusyon kabahin sa kinatibuk-ang kahimtang sa financial system sa nasud ug ang mga konkretong lakang aron mapanalipdan ang katawhan batok sa nagkadaiyang modus sa cybercrime.
Matod sa BSP, ang maong lakang kabahin sa ilang padayon nga paningkamot sa pagpalapad sa financial literacy ug pagpalambo sa digital security ug responsableng paggamit sa mga serbisyo pinansyal.
Giila usab sa bangko sentral ang dako nga papel sa ilang mga media partners sa Bukidnon aron mas daling madala ug mapakaylap ang maong mga importanteng impormasyon ngadto sa tibuok komunidad.
Photo Courtesy: BSP
