Gipahugtan karon sa Bukidnon Police Provincial Office (BukPPO) ang seguridad sa tanang tunghaan sa tibuok probinsya sa Bukidnon. Kini nga dinaliang lakang gihimo agig tubag sa shooting incident sa tacloban nga gikalambigitan sa pagpamusil sa duha ka menor de edad sulod mismo sa usa ka tulunghaan, tumong niini aron masiguro nga dili kini mahitabo sa probinsya.
Gibutyag ni BukPPO Spokesperson, Police Captain Sheila Joy Jangad, sa pakighinabi sa Juander Radyo Malaybalay nga nakig-alayon na sila karon sa mga opisyal sa barangay ug sa Barangay Peacekeeping Action Teams (BPAT). Tumong niini nga masiguro ang kanunay nga presensya sa mga awtoridad ug mga tigpatuman sa kalinaw diha sa palibot sa mga eskwelahan samtang nagpadayon ang mga klase.
Dugang pa ni Jangad, gipaspasan ug gipahugtan usab nila ang koordinasyon uban sa mga nagdumala sa matag tunghaan aron mas mapalig-on ang checkpoints ug pag-inspeksyon sa mga mosulod nga indibidwal. Mopahigayon usab ang mga kapulisan og regular nga pagpatrolya sa mga dapit duol sa mga eskwelahan, ilabina sa oras sa pagsulod ug ting-uli sa mga estudyante
Pinaagi niining dako nga operasyon sa seguridad, gipasalig sa kapulisan sa Bukidnon nga luwas ang mga tinun-an ug magtutudlo gikan sa bisan unsang hulga sa kriminalidad. Gihangyo usab sa kapolisan ang publiko ug ang mga ginikanan nga magbinantayon ug i-report dayon ang bisan unsang kaduda-dudahang lihok sa palibot sa mga tulunghaan
Photo Courtesy: BUKPPO
