Mokabat sa kapin 5,300 ka mga tawo, lakip na ang mga Pilipino, ang nagpabiling binihag sulod sa mga online scam center duol sa utlanan sa Myanmar ug Thailand. Base sa suwat nga gipadala sa Civil Society Network for Human Trafficking Victim Assistance (CSNHTV) ngadto sa kapulisan sa Thailand, gibutyag nga kasagaran sa mga biktima mga langyaw nga natanggong sa mga pasilidad nga gikontrolar sa usa ka armadong grupo sa Myanmar.
Gawas sa Pilipinas, gikan usab sa China, Thailand, Malaysia, Brazil, Russia, ug Kenya ang uban pang mga binihag.
Sumala sa taho sa United Nations, kining mga scam center sa nagkadaiyang dapit sa Southeast Asia, sama sa Myanmar ug Cambodia, nalambigit sa dako nga operasyon sa online fraud nga nagganansya og binilyon ka dolyar matag tuig. Kadaghanan sa mga nagtrabaho niini mga biktima sa human trafficking nga gipangandoy unta og nindot nga trabaho, apan napugos hinuon sa pagpang-scam ubos sa mapahimuslanon ug mapintas nga kondisyon. Bisan pa man og nakaluwas og singko mil (5,000) ka tawo ang gobyerno sa Thailand sa miaging tuig, daghan gihapon nga mga kuta sa scam ang nagpabiling abli ug wala pa maabot sa rescue operations.
Tungod sa padayon nga pag-abli niini nga mga pasilidad, nagpabilin ang hulga sa mga sindikato nga nagpalubad og online fraud ug human trafficking sa tibuok kalibutan, lakip na sa Estados Unidos ug Europa. Nanawagan karon ang mga civil society groups og mas gipakusog nga aksyon gikan sa mga otoridad aron hingpit nga mapu-o kining mga ilegal nga compound ug maluwas ang mga biktima nga nag-antos sa sulod niini.
Photo courtesy: Washington Center for Human Rights
