Hingpit nang nahimong ordinansa ang pagduso sa paggamit og digital o electronic weighing scales diha sa kamerkaduha ug uban pang business establishments sa syudad.
Gipangamahanan ni City Councilor Chris Goking ang Ordinance No. 2025-142 nga nakadawat og suporta sa 21st City Council.
Kini nga ordinansa, dako ang tampo diha sa modernisasyon sa pamatigayon sa syudad nga dili lang alang sa kaayuhan sa mga konsumante apan alang na sab sa mga gagmayng negosyante nga patas ug matinud-anon nga nanginabuhi.
Alang kang Goking, dili lamang kini simpleng ordinansa apan alang kini sa mga Kagay-anon nga muna-munang budget sa ilahang kwarta aron lang adunay makaon ang pamilya, tungod makiangayon lang nga kung unsa ang ilahang gibayran, sakto sab ang timbang sa pagkaon nga ilahang madala.
Usa sab kini sa pamaagi aron nga mapakgang na ang mga limbungan nga timbangan tungod ang karaan nga klase sa timbangan, dali rang madula.
Samtang, pagpasabot ni Goking nga kung hingpit na kining ipatuman, hatagan og 6 ka bulan nga lugway ang mga vendors aron nga maka-comply sa ordinansa.
Photo courtesy: Cagayan de Oro City Information Office
