Nakatala sa Chinatown International District sa Seattle og bag-ong Guinness World Record human malampusong makatigom og 830 ka tawo nga nagkaon og dim sum sa usa ka block party event. Ang rekord natala atol sa usa ka summer kickoff celebration diin opisyal nga nalabwan ang miaging rekord nga 764 ka partisipante nga natala sa Sydney niadtong 2019.
Ang kalihokan giatiman sa Jade Garden, diin ang chef team ug ang amahan sa tag-iya nga si Eric Chan naghimo og mokabat sa 3,600 ka dumplings ug buns alang sa mga nanambong.
Bisan pa nga kapin 900 ka tawo ang mitambong sa maong selebrasyon, 830 lamang ang opisyal nga giihap sa adjudicator sa Guinness World Records. Sumala sa mga tig-organisa, ang uban wala maapil sa opisyal nga ihap tungod kay wala sila nagpabilin sa ilang lingkoranan atol sa pag-validate sa rekord.
Matod ni Chan, nalipay siya sa dakong suporta sa komunidad ug sa pagkab-ot sa rekord nga nagdala og dugang nga atensyon sa Chinatown International District ug sa ilang family-owned business.
Photo Courtesy: The Seattle Times
