Susihon sa Senado karong Hulyo 1 ang nahitabong fatal shooting incident sa usa ka tunghaan sa Tacloban City diin tulo na ka mga tinun-an ang nangamatay.
Mangulo sa pakisusi mao ang chairperson sa Committee on Women, Children, Family Relations, ug Gender Equality nga si Senador Risa Hontiveros diin ipahigayon kini sunod Miyerkules.
Sumala pa nga apilon sa pagtan-aw ang nagkadako nga hulga sa online radicalization sa mga kabatan-onan.
Matod ni Hontiveros, subli sab nga buksan ang hearing diin imbestigaran sa komitiba kung adunay bay papel ang online platforms sa pag-brainwash ug pag-radicalize sa mga batan-on aron makahimo og mga krimen.
Gitumbok sa senador ang mga gihimong imbestigasyon niadtong Abril 14 diin gibutyag niini nga ang mga online platforms ug gaming spaces maoy giingong gigamit sa paghan-ay, pagmaniobra ug pag-radicalize sa hunahuna sa mga batan-on sa paglapas sa balaod.
Samtang, tan-awon sab sa magbabalaod kung paigo ba ang gihimo sa mga online platforms aron mapugngan ang pagpahimulos ngadto sa mga kabatan-onan.
Sumala pa nga gihimug-atan ni Hontiveros nga kung gigamit ang internet sa pagpamiktima sa mga bata, kinahanglan nga adunay manubag ug dili lang puro kita ang atimanon sa mga dagkong kompanya sa teknolohiya.
Photo courtesy: Philippine News Agency
