Human sa insidente sa pagpamusil sa usa ka eskwelahan sa Dakbayan sa Tacloban, gimando ni Cebu Gov. Pam Baricuatro sa Cebu Police Provincial Office (CPPO) ang pagpatuman sa mga lakang aron mapugngan ang susamang hitabo nga mahitabo sa Probinsya sa Sugbo.
Nakigpulong ang gobernadora kang CPPO Director Police Col. Abubakar Udang Mangelen Jr. kagahapong adlawa ug nakadawat og security briefing bahin sa kahimtang sa kalinaw ug kahapsay sa mga eskwelahan sa tibuok probinsya.
Lakip sa mga lakang nga gikonsiderar mao ang pagdeploy og usa ka pulis sa matag eskwelahan alang sa regular nga inspeksyon ug pagpalig-on sa mobile patrols.
Apil usab niini ang mas hugot nga pagmonitor sa mga fraternity, sorority ug mga gang. Gihingusgan sa gobernadora nga ang mga eskwelahan kinahanglan magpabiling luwas nga lugar alang sa mga estudyante ug gawasnon sa kapintasan ug bullying.
Gitawagan usab ni Gov. Baricuatro si Department of Education Cebu Province Superintendent Senen Paulin ug Department of the Interior and Local Government Cebu Provincial Director Jesus Sastrillo aron magtigom sa Provincial Peace and Order Council ugmang adlawa, adlawng Huwebes ug hisgutan ang dugang nga mga lakang aron mas mapalig-on pa ang seguridad sa mga eskwelahan.
Photo courtesy: Cebu Provincial Government
