Nagpahigayon og Simulation Exercise (SIMEX) ang Philippine National Police Surigao City Police Station isip kabahin sa pagpalig-on sa kaandam ug koordinasyon sa mga ahensya sa seguridad ug emerhensya batok sa posibleng pagpamomba sa dakbayan.
Gibase ang maong pagbansay sa usa ka senaryo diin adunay nahitabong bombing incident sa Old Public Market sa Surigao City. Tumong niini ang pagsulay sa kaabtik sa mga personnel sa pagdumala sa maong matang sa emerhensya ug sa ilang kapasidad sa pagpanalipod sa publiko.
Matod ni PLTCOL Atty. Mariano Lukban, Chief of Police sa Surigao City Police Station, importante ang maong pagbansay aron masukod ang kahanas sa mga responder sa pag-atubang sa kritikal nga sitwasyon ug mas mapalig-on pa ang ilang mga pamaagi sa operasyon ug koordinasyon.
Misalmot sa SIMEX ang mga sakop sa PNP, SWAT, EOD, Bureau of Fire Protection, Surigao City Traffic Management Office, Rescue Team, ug City Disaster Risk Reduction and Management Office (CDRRMO), aron susihon ang ilang kapaspas sa pagresponde ug epektibong pagtinabangay panahon sa emerhensya.
