Nasubo ang daghang mga fans sa content creator couple nga sila ni Gavin Asagra ug Elma Asagra human opisyal nga gikumpirma ni Elma ang ilang panagbulag pinaagi sa iyang social media account.
Sa iyang taas ug emosyonal nga pahayag, gipadayag ni Elma nga mutual decision ang ilang pagbulag human sa dugay nilang paningkamot nga maluwas ug mapadayon ang ilang relasyon. Matud pa niya, bisan pa man nga makita silang malipayon sa atubangan sa kamera, adunay mga personal nga pagsulay ug problema nga sila ra mismo ang nakahibalo.
Gipasiugda usab ni Elma nga dili tinuod ang mga alegasyon nga adunay laing babaye o pagpangabit nga nahitabo sa bahin ni Gavin. Sumala kaniya, higala lamang ang babaye nga nalambigit sa mga espekulasyon, ug nahatagan lamang kini og lain-laing interpretasyon sa publiko human mikaylap ang pipila ka mga litrato online.
Gibutyag usab niya nga usahay moabot ang punto nga mawala na ang mutual nga pagbati tali sa duha ka tawo bisan pa man sa ilang dakong gugma ug paningkamot. Alang kaniya, importante nga pareho nga nagmahal ug nagtinguha ang duha aron molungtad ang usa ka relasyon.
Human sa pito ka tuig nga panag-uban, gipasalamatan ni Elma si Gavin sa tanang mga handumanan, mga damgo nga ilang natuman nga magkauban, ug sa gugma nga iyang gihatag dili lamang kaniya kondili usab sa iyang pamilya.
Bisan pa sa ilang panagbulag, gipasabot ni Elma nga magpadayon gihapon silang magtinabangay ug magrespeto sa usag usa samtang nagpadayon sila sa ilang tagsa-tagsa ka bag-ong panaw sa kinabuhi.
Nanawagan usab ang duha sa ilang mga supporters nga respetohon ang ilang pribasiya samtang giatubang ang kasakit nga ilang gibati karon.
Ang panagbulag nila ni Ser Geybin ug Elma nagtapos human sa pito ka tuig nga relasyon nga gisubaybayan ug gihigugma sa daghang mga fans sa social media. Bisan pa man sa kasubo, daghan ang nagpadala og mensahe sa suporta ug pag-ampo alang sa ilang duha samtang nag-atubang sila sa bag-ong kapitulo sa ilang kinabuhi.
Photo Courtesy: The Global Filipino Magazine
