Gisugyot ni Konsehal Al Legaspi nga mas pakusgon pa sa lokal nga panggamhanan sa Cagayan de Oro ang suporta alang sa mga Barangay Disaster Risk Reduction Management Responders subay na sab sa mga nagtunhay nga balaud.
Matud pa ni Legaspi nga ang mga Barangay responders ang anaa sa frontline diha sa paghatud og serbisyo labi na sa panahon sa kalamidad ug katalagman nga andam mualagad 24 oras alang sa kaluwasan sa katawhan.
Sa iyang espesyal nga report atol sa regular nga sesyon sa 21st City Council, gipahayag ni Legaspi nga ang dugang nga suporta naglakip sa mga capacity-building program, espesyal nga pagbansay (specialized training), ug ang paghatag sa mga gikinahanglang kagamitan aron mapalambo ang kaepektibo sa mga responder.
Dugang pa ni Legaspi, daghang barangay ang nag-atubang og kakuwang sa pundo, hinungdan nga maglisod sila sa pagpadayon ug pagdasig sa mga volunteer responder. Ang mga BDRRM responder nagadawat karon og honorarium nga nagkantidad og P3,000 hangtod P4,000 matag bulan.
Ubos sa sugyot, mahimong ihatag ang dugang suporta nga mobalor og P2,000 matag bulan, depende sa aktibong pagka-miyembro, pagsunod sa gikinahanglang pagbansay, ug kung duna ba’y pundo nga magamit.
Ang sugyot gi-endorso na ngadto sa mga komitiba sa Barangay Affairs, Public Order and Safety, Finance, ug Ways and Means alang sa dugang nga pagtuon ug deliberasyon.
Photo courtesy: Cagayan de Oro City Information Office
