Nangayo og kooperasyon ang Philippine National Police (PNP) sa mga ginikanan, magtutudlo ug school administrators aron masubay ang online activity sa mga kabataan human sa makalilisang nga pagpamusil sa sulod sa usa ka eskwelahan sa Tacloban City nga mikalas sa tulo ka estudyante ug nakaangol og 13 ka estudyante.
Matod ni PNP Chief Police General Jose Melencio Nartatez Jr., importante nga mabantayan sa mga ginikanan ang paggamit sa ilang mga anak sa social media ug gadgets sama sa ilang pag-atiman sa pisikal nga kahimtang niini.
Gihangyo usab niya ang mga magtutudlo nga mahimong kaabag sa pag-ila sa mga kabataan nga nagpakita og kalit nga pagbag-o sa pamatasan o peligroso nga interes aron malikayan ang posibleng kapintasan.
Base sa imbestigasyon, usa sa mga suspek nga menor de edad giingong nag-post og mga video nga may kalabotan sa armas ug kapintasan sa internet sa wala pa mahitabo ang insidente. Padayon usab nga gisusi sa kapulisan kung adunay kalabotan ang bullying ug uban pang sosyal nga mga hinungdan sa nahitabong trahedya.
Samtang, nakigtambayayong na ang PNP sa Department of Education aron mapalig-on ang mga safety protocols sa mga eskwelahan ug mapugngan ang susamang mga insidente sa umaabot.
Photo Courtesy: Philippine News Agency
