Patay ang tulo ka indibidwal nga gilangkuban sa usa ka pulis, usa ka sibilyan ug ang giingong suspek human sa usa ka madugong pagpamusil sa Montreal, Canada niadtong Lunes sa udto.
Sumala sa Montreal Police, nadawat nila ang report bahin sa nahitabong shooting incident sa Cote-des-Neiges area alas 11:30 sa buntag. Sa pag-abot sa mga kapulisan, nakigpinusilay ang usa ka armadong lalaki nga giingong nagpabuto gikan sa sulod sa usa ka bilding gamit ang taas nga klase sa armas.
Namatay sa insidente ang usa ka lalaking pulis samtang grabeng naangol ang usa ka babayeng pulis. Matod sa mga awtoridad, luwas na kini sa peligro ug padayon nga ginatambalan sa ospital.
Gihulagway ni Montreal Police Chief Fady Dagher ang nahitabo isip usa ka makalilisang nga trahedya ug bangungot, nga talagsaon lamang mahitabo sa maong syudad dili kasagaran ang mga pagpamusil sa hayag nga adlaw.
Tungod kay ang insidente nahitabo sa usa ka lugar nga adunay daghang establisyemento ug institusyon sa komunidad sa mga Hudiyo, adunay mga espekulasyon nga posible kini nga may kalabotan sa hate crime o terorismo. Apan giingon sa mga awtoridad nga wala pa silay nakitang ebidensya aron makumpirma ang motibo sa suspek.
Gihangyo usab sa mga opisyal ang publiko nga likayan ang pagpakatap sa fake news ug pasagdan ang mga imbestigador sa pagkompleto sa ilang imbestigasyon.
Samtang, nagpahayag og kasubo si Mark Carney ug giingong nakurat siya sa nahitabong kapintasan. Human sa operasyon, gibawi na sa pulisya ang lockdown sa maong lugar ug gitugotan na pag-usab ang normal nga paglihok sa mga residente.
Photo Courtesy: CityNews Montreal
