Nasikop sa kapulisan ang usa ka 45-anyos nga laborer nga giila lamang sa alyas nga “Ren-Ren” atol sa manhunt operation nga gihimo sa Purok 9, Barangay Poblacion, Sulop, alas-4 sa hapon kagahapon Hunyo 23, 2026.
Ang operasyon gipangunahan sa Sulop Municipal Police Station Tracker Team ubos sa pagdumala ni PCPT Raymond S. Martinez, inubanan sa mga operatiba gikan sa CIDG Region 12, 1104th Maneuver Company RMFB, ug 1st Davao del Sur Provincial Mobile Force Company.
Gidakop ang suspek pinaagi sa warrant of arrest alang sa kasong homicide nga giisyu niadtong Agosto 1, 2021 sa Regional Trial Court Branch 38 sa Alabel, Sarangani. Gitakda sa korte ang piyansa nga nagkantidad og P40,000.
Sa pagdakop, gipahibalo ang suspek sa iyang mga katungod sumala sa balaod sa pinulongang iyang nasabtan. Siya karon anaa na sa kustodiya sa Sulop MPS alang sa hustong legal nga proseso.
