Nagpahayag ang aktres nga si Maureen Larrazabal sa iyang paglaum nga mahimong legal ang same-sex marriage sa Pilipinas, ilabina karong pagsaulog sa Pride Month.
Gibutyag ni Larrazabal ang iyang pangandoy atol sa media gathering para sa ika-16 nga anibersaryo sa sitcom nga “Pepito Manaloto.” Matod niya, kung molahutay pa ang serye hangtod sa ika-20 nga tuig, nanghinaot siya nga maaprubahan na ang same-sex marriage sa nasud.
Sa maong programa, iyang gihulagway ang karakter nga si Mara Quijanos, usa ka transgender woman nga dugay nang adunay relasyon kang Tommy Diones. Sumala sa aktres, daghang miyembro sa LGBTQIA+ community ang maka-relate kang Mara tungod sa iyang lawom nga gugma bisan pa sa mga kasakit ug kapakyasan sa relasyon.
Bisan og suportado niya ang legalisasyon sa same-sex marriage, gipasabot ni Larrazabal nga alang kaniya, mas importante ang commitment, pagsalig ug adlaw-adlaw nga pagpili sa usag usa kaysa sa usa ka marriage certificate.
Photo courtesy to: PEP.ph
