Usa ka monghe sa India nga si Daulat Giri Ji Maharaj ang nakapahingangha ug nakapakatawa sa mga netizens human mabutyag nga lima na ka tuig siyang wala molingkod ug wala mohigda isip kabahin sa iyang 12 ka tuig nga panaad espiritwal.
Samtang ang ubang tawo mangita og lingkuranan bisan lima ka minuto pa lang nagtindog, si Maharaj matod pa bisan matulog nagbarog gihapon gamit ang espesyal nga harness ug lubid aron dili matumba.
Tungod sa sige og tindog, nanghubag ug nangitom na ang iyang mga tiil, hinungdan nga ang mga doktor nagpasidaan nga basin maabot ang panahon nga kinahanglan na kini og seryosong pagtambal.
Samtang naglibog ang uban kung unsaon niya pagkatulog, mas daghan ang nangutana unsaon niya paglahutay nga dili molingkod bisan kadiyot.
Sa pagkakaron, matod sa mga netizens nga kung adunay award para sa pinakataas nga “standing ovation” sa kalibutan, klaro na kinsa ang modaog. Ug kung tinuod man, basin siya ra usab ang dili molingkod panahon sa awarding ceremony.
Photo courtesy: Medyadar
