Posibleng mamahimong usa sa top five beauty product exporters sa kalibotan ang Pilipinas sulod sa sunod tulo ka tuig, sumala sa usa ka opisyal sa industriya sa beauty ug wellness.
Matod ni Rungphech Chitanuwat, Country General Manager sa Informa Markets Philippines, nagkadako ang oportunidad sa mga produktong pangpatahom nga gihimo sa Pilipinas tungod sa pagsaka sa demand sa skincare, wellness, ug self-care products sa lokal ug internasyonal nga markets
Gipasabot niya nga nagkakusog usab ang kompetisyon sa mga Filipino beauty brands batok sa ubang nasod sa Asya, ilabi na nga naggamit ang mga lokal nga manufacturer og natural ug lumad nga sangkap sama sa lubi o coconut sa paghimo sa mga produkto.
Dugang pa niya, gilauman niyang mas daghan pang “Made in the Philippines” nga beauty products ang makita sa internasyonal nga merkado sa umaabot nga mga tuig.
Ang maong pahayag miabot samtang padayon ang kusog nga pagtubo sa beauty ug personal care industry sa Pilipinas, nga gitan-aw karon isip usa sa mga sektor nga adunay dakong potensyal sa eksport ug ekonomikanhong kalamboan.
Photo Courtesy: Vocal Media
