Nakatakdang rebyuhon sa Senado ang tanang balaod nga may kalabotan sa kaluwasan sa mga magtulungha, lakip na ang Child Safety Act ug Anti-Bullying Act, aron mapalig-on ang mga mekanismo niini ug madugangan og “pangil” batok sa dahas.
Nagkahiusa ug nagkasinabot sila si Senador Bam Aquino, Pia Cayetano, Risa Hontiveros, ug Erwin Tulfo sa pag-imbestigar sa nahitabong duguong pagpamusil sa San Jose National High School didto sa Tacloban City. Ang trahedya mikalas sa kinabuhi sa tulo ka estudyante ug nagbilin sa unom pa nga samaran, diin ang mga suspek nailhang duha ka menor de edad nga nag-edad og 15 ug 14 anyos.
Usa sa mga nag-unang sutaon sa Senado ang pamaagi kung giunsa nakasulod ang armas sa sulod sa tunghaan. Sila si Aquino ug Hontiveros parehong nagkanayon nga ang mga eskwelahan kinahanglang magpabilin nga usa ka luwas nga dapit ug dili mamahimong espasyo sa kahadlok ug dahas, samtang si Cayetano nanawagan og usa ka whole-of-society approach uban sa DepEd ug mga ahensya sa kaayohan sa kabataan aron masusi ang hinungdan sa bayolenteng binuhatan sa mga batan-on. Dako usab ang pagpahasubo sa upat ka magbabalaud ngadto sa mga pamilya sa biktima ug sila misaad nga mangita og legal nga pamaagi pinaagi sa balaod aron dili na kini masubli pag-usab sa nasod.
Sa laing bahin, bisan pa man sa iyang pagpahasubo, hugot nga gikondena ni Senador Erwin Tulfo ang krimen ug iyang gipadayag nga hugot nga imbestigahan ang ugat hinungdan sa aksidente nga posibleng grabe nga bullying.
Sumala ni Tulfo, maka-alarma na kini alang sa tanang eskwelahan tungod kay kung kaniadto ang epekto sa bullying kay mga sakit nga pulong o pagguba sa kaugalingong kinabuhi, karon miresulta na kini sa pagpamatay sulod mismo sa gikonsiderang ikaduhang balay sa mga bata.
Isip Chairman sa Senate Committee on Social Justice, Welfare, and Rural Development, nanawagan siya sa dinaliang imbestigasyon aron matino kung adunay pagpabaya ang tunghaan ug aron mapalig-on ang implementasyon sa Anti-Bullying Act.
Photo courtesy: Philippine News Agency
