Nagatuo ang bilyonaryong negosyante ug founder sa Amazon nga si Jeff Bezos nga ang artificial intelligence kon AI magdala og kakulangan sa mga trabahante imbes nga kaylap nga pagkawala sa trabaho.
Sa iyang pakigpulong sa VivaTech technology fair didto sa Paris, iyang gisupak ang mga kahadlok nga pulihan sa AI ang dakong bahin sa mga mamumuo. Matod pa niya, dili siya uyon niini tungod kay ang AI makatabang sa mga tawo nga makakita og mas daghang problema nga kinahanglang sulbaron, butang nga magkinahanglan hinuon og dugang trabahante.
Gipasabot ni Bezos nga dili ang imahinasyon sa tawo ang nagpugong sa inobasyon, kondili ang kakayahan sa pagpatuman sa mga ideya. Daghang mga nindot nga konsepto ang wala natuman kaniadto tungod kay lisod kining buhaton, apan pinaagi sa AI, mamahimo nang mapadali ug mapaspas ang proseso sa pagmugna sa mga bag-ong imbensyon. Kini nga pamahayag sa negosyante natunong usab sa padayong pagpalapad sa pamuhunan sa Amazon sa natad sa AI, taliwala sa taho nga may 30,000 ka trabaho na ang nakuha sa iyang kompanya sukad sa miaging tuig tungod sa paggakos niini sa teknolohiya.
Gawas sa AI, gihanduraw usab ni Bezos ang kaugmaon sa space exploration diin iyang gihisgutan nga ang labing dako nga hagit sa umaabot ang limitadong agianan o access padulong sa kawanangan, ug dili ang kakulang sa interes sa mga tawo. Mapasalamaton ug madasigon niyang gipahayag ang iyang dakong tinguha sa pag-ingon nga ang pag-adto sa bulan dili lang kay alang sa usa ka pagbisita, kondili alang sa permanente nga pagpuyo didto.
Photo courtesy: Toolshero
