Gibawi na ang moratorium sa pagsaka sa bayronon alang sa mga transaksiyon sa InstaPay ug PESONet, nga nagtugot sa mga payment service provider nga mag-adjust sa ilang mga singil ubos sa bag-ong pricing framework alang sa electronic fund transfers.
Sa usa ka memorandum, si Bangko Sentral ng Pilipinas (BSP) Deputy Governor Mamerto Tangonan miingon nga giaprobahan sa Monetary Board ang pagtangtang sa moratorium pinaagi sa Resolution No. 498 nga gipetsahan og Hunyo 4.
Ang maong kausaban sa polisiya ipatuman dungan sa BSP Circular No. 1238, nga gipetsahan usab og Hunyo 17, nga nag-usab sa National Retail Payment System Framework ug sa Regulatory Framework for Merchant Payment Acceptance Activities.
Ang lakang naglangkob sa tanang direktang clearing participants sa InstaPay ug PESONet automated clearing houses, lakip na ang mga bangko ug ubang payment service providers nga direktang miapil sa maong mga sistema sa pagbayad.
Matod sa BSP, ang pagtangtang sa moratorium gibase sa duha ka dagkong kausaban: ang pagpatuman sa zero fees alang sa gagmayng merchant payments ug ang pagtukod sa usa ka pricing structure alang sa person-to-person electronic fund transfers.
Bisan pa nga ang lakang naghatag og mas dakong kagawasan sa mga payment provider sa pagrepaso sa transaction fees, sigon sa BSP nga magpabilin ang mga proteksiyon aron mapanalipdan ang mga konsumidor ug masiguro ang hustong pagdumala sa digital payment services.
Padayon nga giawhag sa BSP ang finance sector nga palapdan ang access sa digital payments, pakunhodon ang pagsalig sa cash, ug himuong mas inklusibo ang electronic transactions.
Photo courtesy: x.com
