Mangutang ang administrasyong Marcos og moabot sa ₱1.12 trilyon gikan sa lokal nga merkado sa utang alang sa ikatulong kwarter (Hulyo hangtod Septiyembre) ning tuiga, isip paghatag og dakong gibug-aton sa domestikong panalapi taliwala sa mga kalibutanong kawalay-kasisiguroan ug taas nga gasto sa pautang sa gawas sa nasud.
Sumala sa memorandum gikan sa Bureau of the Treasury (BTr), plano sa kagamhanan nga kuhaon ang maong kantidad pinaagi sa subasta sa mga short-term Treasury bills (₱700 bilyon) matag adlawng Lunes ug long-term Treasury bonds (₱420 bilyon) matag adlawng Martes.
Bisan pa man niini, gipasalig ni National Treasurer Sharon Almanza nga dili malapas sa gobyerno ang kinatibuk-ang ₱2.05 trilyon nga target sa pagpangutang alang sa tibuok tuig, human usab sa natala nga ₱824 bilyon nga utang sa unang karter ug ₱784 bilyon sa ikaduhang karter.
Sumala ni John Paolo Rivera, usa ka senior research fellow sa Philippine Institute for Development Studies (PIDS), ang maong lakang nagpakita lang sa estratehiya sa kagamhanan nga mosalig una sa lokal nga pondo aron malikayan ang kakuyaw sa nag-usab-usab nga bili sa piso ug ang nagkataas nga interes kung mangutang sa gawas sa nasud
Photo Courtesy: Pinterest
