Gipadayag sa Kilusang Mayo Uno (KMU) nga lisod makab-ot ang tinuod nga kalamboan sa kinabuhi sa mga Pilipino kon ang prayoridad sa kadaghanang kompanya ang pagdugang lamang sa ginansya ug dili ang kaayohan sa ilang mga trabahante.
Sumala kang Tita Jadman, Regional Coordinator sa KMU Northern Mindanao, talagsaon lamang ang mga negosyante sa nasod nga nagsunod sa mga prinsipyo nga naghatag og dakong bili sa patas nga suholan, lig-on nga labor rights ug pagkunhod sa kalainan sa kahimtang sa ekonomiya tali sa mga adunahan ug kabus.
Dugang pa niya, daghang mamumuo ang padayon nga nag-atubang og kalisod tungod sa kakulang sa kita nga igo lamang alang sa adlaw-adlaw nga panginahanglan sa ilang pamilya.
Gidugang usab ni Jadman nga gilauman sa ilang grupo nga repasohon ug pauswagon sa gobyerno ang mga polisiya kabahin sa suholan aron masiguro nga makadawat ang mga mamumuo og igo ug makatarunganong sweldo.
Matud sa KMU, ang paghatag og mas maayong suhol ug proteksyon sa mga trabahante makatabang aron dili na mapugos ang daghang pamilya sa pagsalig sa utang aron lamang matubag ang ilang batakang panginahanglan sama sa pagkaon ug uban pang gastuhan sa adlaw-adlaw.
Photo courtesy: Pinoy Weekly
