Gihingusgan ni City Councilor Jonjon Rodriguez ang dinalian nga pagtukod sa usa ka moderno ug permanenteng Hall of Justice building dinhi sa dakbayan, human sa kapin usa ka dekada nga pag-abang lamang sa mga korte diha sa Mastersons Avenue tungod sa nahitabong sunog sa kanhi building kaniadtong 2015.
Matod ni Rodriguez, bisan pa man kung giila ang Cagayan de Oro isip usa ka Highly Urbanized City, dako nga kakuwangan nga wala kini kaugalingong tarong nga Hall of Justice. Gawas niini, gihatagan usab niya og gibug-aton ang seryosong hulga sa seguridad sa syudad tungod sa kadaghan sa mga high-profile nga kaso nga ginahandle sa mga korte sa kasamtangan.
Tungod niini, nangayo si Rodriguez og suporta sa iyang mga kaubanan sa City Council aron mapasar ang usa ka resolusyon nga gikinahanglan na lamang ni Congressman Rufus Rodriguez aron hingpit nga malihok ug makalap ang gikinahanglang proposed budget nga nagkantidad og P2 billion. Ang dako nga proyekto nakatakdang itukod isip usa ka Hall of Justice Complex didto sa Barangay Indahag.
Sa ulahi, giaprubahan sa konseho ang Resolution no. 2026-357 sa paghangyo sa Supreme Court of The Philippines alang niini nga katuyu-an.
Photo courtesy: Bobby Lagsa/ Rappler
