Nahitabo ang kusog nga pagbusikad ug sunog sulod sa usa ka pabrika sa Ras Laffan industrial zone, Doha, Qatar, nga nagbilin og dakong kadaut ug ubay-ubay ang nanga-angol. Matod sa kompanyang QatarEnergy ug sa Ministry of Interior sa Qatar, ang insidente nagsugod tungod sa usa ka technical malfunction sa Barzan gas supply facility samtang gisugdan pa lamang ang operasyon niini. Gumikan sa kakusog sa pagbusikad, nabati ang pagtay-og sa mga lagyong dapit, diin base sa inisyal nga report, miabot sa 54 ka tawo ang nasamdan samtang anaa sa 18 ka indibidwal ang gikatahong nawala.
Ang Ras Laffan ang giila nga pinakadakong pasilidad sa Liquefied Natural Gas (LNG) sa tibuok kalibutan nga nahimutang sa amihanang baybayon sa Qatar. Hinuon, daling nakontrol sa Civil Defence teams ang kalayo, ug gipamahayag sa kagamhanan nga walay nahitabong pagtagas o leak sa gas o kemikal nga makahatag og hulga sa kaluwasan sa publiko. Bisan pa man niana, padayong gibantayan sa mga awtoridad ang lugar tungod kay haduol man kini sa mga dapit diin nanarbaho ang daghang mga Overseas Filipino Workers (OFWs) sa rehiyon.
Sa wala pa kini nga insidente, grabe na nga naapektuhan ang Ras Laffan hub tungod sa bag-ong giyera tali sa US, Israel, ug Iran, hinungdan nga napugos ang Qatar sa pagpahunong sa ilang gas production. Tungod sa mga pag-atake ug sa bag-ong pagbusikad, gibanabanang molungtad pa og tulo ngadto sa lima ka tuig una hingpit nga maayo ang pasilidad, ug gilauman usab nga makunhuran og 17 porsyento (17%) ang kapasidad sa nasod sa pag-eksport og LNG sa tibuok kalibutan.
Photo courtesy: Gasworld
