Hingpit nga gipahinumdoman sa Manolo Fortich Road Traffic Administration (MFRTA) ang tanang drayber sa motorsiklo nga bawal ang paggamit sa “nutshell” helmet ug ang pagsul-ob og tsinelas samtang nagbiyahe sa dalan.
Sumala ni MFRTA Operation Officer III Jean Paul Villavito, ubos sa Republic Act 10054 o Motorcycle Helmet Act, kinahanglan gayod nga standard ug aprubado nga safety helmet ang gamiton sa mga drayber aron masiguro ang ilang kaluwasan kung adunay aksidente. Giinsistar usab sa opisyal nga ang mga empleyado sa lokal nga kagamhanan sa Manolo Fortich ang kinahanglang mag-una ug mahimong maayong ehemplo sa komunidad pinaagi sa pagsunod sa mga balaod sa trapiko.
Giklaro ni Villavito nga ang maong regulasyon, ilabi na ang pagdili sa pag-tsinelas, magamit sa tanang drayber sa motorsiklo ug dili lang alang sa mga drayber sa habal-habal tungod kay delikado kini sa kaluwasan. Sa laing bahin, giangkon sa MFRTA nga wala pa silay nadawat nga opisyal nga ordinansa nga hingpit nga nagdili sa mga “pasahero” sa habal-habal sa paggamit sa nutshell helmet. Bisan pa man niini, nagpabilin nga responsibilidad sa drayber ang pagsiguro nga husto ang pagkakasuot ug pagka-strap sa helmet sa ilang karga nga pasahero.
Dugang pa sa MFRTA, ang hugot nga pagpatuman niini nga mga lagda gihimo dili aron manghasi, kondili aron mapanalipdan ang kinabuhi sa mga motorista ug sa tibuok komunidad. Nanawagan ang buhatan sa kooperasyon sa publiko tungod kay ang disiplina sa dalan ug ang paggamit sa hustong safety gear mao ang nag-unang yawe aron makalikay sa mga makamatay nga disgrasya sa trapiko
Photo Courtesy: Manolo Fortich Road Traffic Administration
