Nasakmit sa mga operatiba sa Criminal Investigation and Detection Group (CIDG) ang nagkantidad og kapin P5.5 milyon nga gidudahang adulterated, recycled, walay label, ug walay rehistro nga mga mantika sa usa ka hiniusang operasyon niadtong Hunyo 18, 2026, didto sa Barangay Poblacion, Valencia City, Bukidnon.
Pito ka mga indibidwal ang malampusong nasikop sa mga awtoridad human sila naatlan nga namaligya ug nag-apod-apod sa maong mga iligal nga produkto sulod sa usa ka bodega ug tindahan. Gihimo ang maong raid tungod sa paglapas sa Food and Drug Administration (FDA) Act of 2009 (RA 9711), Consumer Act of the Philippines (RA 7394), ug Food Safety Act of 2013 (RA 10611).
Upat sa mga suspek ang nadakpan sulod sa usa ka sari-sari store, samtang ang laing tulo ang nasikop mismo sa bodega diin nakumpiska ang bulto-bultong kontrabando. Sa kinatibuk-an, nasakmit sa CIDG Bukidnon ang usa ka tangke nga dunay 15,000 ka litro sa mantika ug libu-libong galon ug plastik nga sudlanan nga nagkantidad og P4.32 milyon. Samtang ang CIDG Cagayan de Oro nakasabat usab og duha ka tangke nga dunay 9,700 ka litro, kauban ang mga repacked nga mantika nga mibalor og P1.2 milyon, human nasuta nga ang maong bodega ug mga tangke walay gikuha nga permit o license to operate gikan sa FDA.
Gipasabot sa CIDG nga hugot nga gidili ubos sa balaod ang paghimo, pagbaligya, ug pag-apod-apod sa mga produktong pagkaon nga walay saktong rehistrasyon ug awtorisasyon gikan sa FDA. Nagpahinumdom ang mga awtoridad sa publiko nga dako og delikado sa panglawas ang maong mga mantika tungod kay wala kini moagi sa saktong evaluation process, hinungdan nga dili masiguro ang kalidad ug kaluwasan niini alang sa konsumo sa tawo
Photo Courtesy: CIDG
