Nanawagan si Senador Robin Padilla sa iyang mga kaubang senador nga suportahan ang iyang gipasaka nga Senate Bill No. 372 nga nagtumong sa pag-amyenda sa Juvenile Justice and Welfare Act (RA 9344) aron ubsan ngadto sa 10 hangtod 15 anyos ang edad sa criminal responsibility alang sa mga menor de edad nga malambigit sa mga makalilisang nga krimen (heinous crimes).
Gihimo ni Padilla ang maong lakang human sa sunod-sunod nga krimen nga gikalambigitan sa mga kabatan-onan, ilabi na ang bag-ong nahitabong madugong pagpamusil sa San Juan National High School sa Tacloban City diin tulo ang patay ug lima ang naangol human namusil ang mga suspek nga mga estudyante ra usab sa maong tunghaan.
Luyo sa iyang mga giduso nga balaodnon, giklaro ni Padilla nga nagpabiling maayo ang iyang relasyon ug wala silay personal nga bikil ni Senate President Sherwin Gatchalian, taliwala sa ilang magkalahing baroganan sa politika.
Nagpasalamat pa gani ang senador sa gipakitang suporta sa liderato sa Senado sa ilang bag-ong kalihokan nga gipahigayon sulod sa gambalay sa Senado, dungan sa pag-ingon nga lahi nga hisgutanan ang trabaho ug ang ilang personal nga panaghigalaay.
Photo Courtesy: Philippine Newa Agency
