Nabayran na sa Philippine Health Insurance Corporation (PhilHealth) ang 98.74% sa unang hugna sa mga claim ubos sa Yaman ng Kalusugan Program (YAKAP) alang sa tuig 2026.
Sumala sa gipagawas nga public advisory niadtong Lunes, kini nga lakang dako og tabang aron mapalig-on ang pondo sa mga akreditado nga klinika sa nasod. Ang maong programa mao ang gi-rebrand ug gipalapdan nga bersiyon sa kanhi “Konsulta” primary care package.
Lahi sa karaan nga sistema, ang YAKAP naggamit na karon sa capitation payment model diin ang mga akreditado nga klinika makadawat og takdang tinuig nga pondo matag rehistradong pasyente, imbes nga bayran sila kada konsultasyon. Gihimo kini aron masiguro ang padayon ug lig-on nga cash flow sa mga community clinic nga maoy unang dangpanan sa mga kabos nga pasyente.
Aron mahimong hapsay ang pag-apod-apod sa pondo, gibahin sa PhilHealth sa duha ka hugna ang pagpagawas niini: ang unang tranche nga nagkantidad og 40 porsiyento sa pondo awtomatikong ma-aktibo human sa unang konsultasyon ug pagpirma sa empanelment slip sa pasyente. Samtang, ang nahibiling 60 porsiyento ipagawas lamang base sa mga nahuman nga konsultasyon, mga resulta sa laboratoryo, ug gihatag nga mga reseta.
Photo Courtesy: Philippine News Agency
