Nanawagan si Robin Padilla nga hatagan og higayon ang iyang gipanukalang pag-amyenda sa Juvenile Justice and Welfare Act.
May kalabutan kini sa nahitabong pagpamusil sa usa ka high school sa Tacloban City nga misangpot sa kamatayon sa tulo ka tawo ug pagkasamad sa uban pa, diin duha sa mga suspek gikatahong menor de edad.
Sumala ni Padilla, ang minimum age of criminal responsibility kinahanglan ipaubos ngadto sa 10 anyos gikan sa kasamtangang 15 anyos tungod sa nagkagrabeng mga krimen nga nalambigit na usab ang mga kabatan-onan.
Gipasabot sa senador nga sa daghang nasod sa Europa, diin nahimutang usab ang mga opisina sa United Nations Human Rights, 10 anyos ang gitakdang minimum age of criminal responsibility. Matod niya, daghan na usab sa mga maayong pamaagi sa ubang nasod nga gisunod sa Pilipinas, busa ang maong polisiya kinahanglan usab tagdon.
Gipunting pa ni Padilla nga nagkadaghan ang mga kabatan-onang nalambigit sa mga krimen sama sa pagpangholdap, pagpanglugos, ug karon bisan sa mga insidente sa pagpamusil.
Photo Courtesy:PEP.ph
