Hinay-hinay nang wagtangon sa Department of Education (DepEd) ang paggamit sa grade transmutation sa mga pampublikong eskwelahan aron mas tukma nga mapakita ang tinuod nga performance sa mga estudyante.
Ubos sa DepEd Order Number 015, Series of 2026, giusab ang mga polisiya sa assessment, grading, ug recognition aron mahiuyon sa Revised K to 10 ug Strengthened Senior High School curricula. Alang sa School Year 2026-2027, magpadayon gihapon ang paggamit sa transmutation pinaagi sa bag-ong conversion table diin ang raw score nga 70 mahimong passing grade nga 75.
Apan sugod sa School Year 2027-2028, dili na gamiton ang transmutation alang sa mga estudyante sa Grade 4 hangtod Grade 12. Pasabot niini nga ang makuhang grado sa estudyante mao na usab ang direktang ipakita sa final grade.
Gipasiugda usab sa DepEd nga dili mahimong gamiton sa mga magtutudlo ang artificial intelligence sa pagdesisyon sa final grades sa mga estudyante.
Tugotan lamang kini sa paghimo og test items, assessment ideas, ug uban pang buluhaton basta susihon ug aprobahan gihapon sa magtutudlo ang tanang resulta.
Gilauman sa DepEd nga makatabang ang maong polisiya aron mas patas, mas tukma, ug mas transparent ang sistema sa paghatag og grado sa mga estudyante.
Photo Courtesy: Philippine News Agency
