Miresbak ang Meralco Bolts ug Barangay Ginebra San Miguel human nakabangon gikan sa ilang kapildihan aron mapantay ang ilang best-of-seven semifinals’ series sa Philippine Basketball Association Season 50 Commissioner’s Cup sa 1-1.
Gamit ang dakong kahigayunan nga ilang nakuha, gidaog sa Meralco ang TNT Tropang 5G sa iskor nga 87-76.
Nanguna si Chris Newsome nga adunay 24 puntos, diin 15 niini iyang gihimo sa katapusang kuwarter. Midugang usab si Marvin Jones og 16 puntos ug 13 rebounds, samtang si Javee Mocon nakatampo og 16 puntos alang sa Bolts.
Dako usab og epekto sa duwa ang pagkaangol sa import sa TNT nga si Bol Bol sa nahibiling 2:37 sa unang kuwarter. Gikompirma sa TNT management nga nagisi ang Achilles tendon ni Bol, hinungdan nga dili na siya makadula sa nahibiling bahin sa serye.
Sa laing semifinals matchup, mibuto si Justin Brownlee og 31 puntos, 15 rebounds ug walo ka assists aron tabangan ang Gin Kings sa pagdaog kontra sa Rain or Shine Elasto Painters, 109-101.
Nagdula usab og maayo si RJ Abarrientos uban sa 21 puntos, unom ka assists, duha ka steals ug duha ka rebounds, samtang si Scottie Thompson nakahatag og 15 puntos, unom ka rebounds ug unom ka assists.
Si Japeth Aguilar midugang og 14 puntos, 12 rebounds ug tulo ka assists, samtang si Troy Rosario adunay 11 puntos, upat ka rebounds ug tulo ka assists aron mapalig-on ang balanseng opensiba sa Gin Kings.
Photo courtesy: GMA News Online
