Gipa-ubsan sa Land Bank of the Philippines (LandBank) ang singil sa InstaPay transfer alang sa person-to-person nga mga transaksyon ngadto sa hapit katunga sa kasamtangang kantidad, ug sa dili madugay tangtangon na usab niini ang singil alang sa pipila ka mga online nga transaksyon sa gobyerno.
Gianunsyo sa LandBank niadtong miaging Huwebes nga ang singil gipaubsan gikan sa ₱15 ngadto na lang sa ₱8 sugod niadtong Mayo 21. Ang diskwento magamit sa mga fund transfer nga gihimo pinaagi sa mobile banking app sa bangko sa gobyerno ug sa iAccess retail Internet banking.
Dugang pa niini, mohatag usab ang LandBank og usa ka libreng InstaPay transfer matag adlaw alang sa mga transaksyon nga nagkantidad og ₱1,000 paubos.
Gilauman nila nga kini nga lakang makadasig sa mas daghang tawo nga mogamit sa cashless payment channels. Plano sa bangko nga seryosohon pa kini nga tumong pinaagi sa paghimo nga libre sa pipila ka person-to-government nga mga online payment, sama sa buhis ug uban pang obligasyon sa publiko.
Sumala ni LandBank President ug CEO Lynette V. Ortiz, ang LandBank nagpabiling lig-on sa pagpalambo sa financial inclusion pinaagi sa paghimo sa digital banking nga mas barato ug mas sayon maabot.
Pinaagi sa pagpaubos sa transaction fees, gihatagan nila og higayon ang mas daghang Pilipino nga mogamit sa luwas ug sayon nga digital channels alang sa ilang adlaw-adlaw nga transaksyon sa panalapi.
Niadtong miaging tuig, nakatala ang LandBank og 27-porsyento nga pagsaka sa paggamit sa ilang mga digital platform. Ang bangko nagproseso sa kinatibuk-ang 800.26 ka milyon nga digital transactions nga mikatidad og ₱4.41 trilyon, o 30-porsyento nga pagsaka sa gidaghanon sa transaksyon gikan niadtong 2024.
Ang mga transaksyon pinaagi lang sa mobile banking app sa bangko miabot ngadto sa 714.39 ka milyon, nga nagkantidad og ₱618.82 bilyon niadtong 2025, nga nagpakita og year-on-year growth nga 26 porsyento sa gidaghanon ug 37 porsyento sa kantidad.
Photo courtesy: Department of Finance/ Facebook
