Giklaro sa National Anti-Poverty Commission (NAPC) Region 9 nga ang pagbatok sa kapobrehon ug nagkataas nga kaso sa teenage pregnancy sa rehiyon dili lamang responsibilidad sa gobyerno kondili kinahanglan usab ang aktibong partisipasyon sa katawhan ug lain-laing sektor sa komunidad.
Sa Press Conference sa Media, giingon ni Julieta Tigo, ang Regional Coordinator workers sa informal sector sa NAPC, nga bisan adunay nagkalain-laing programa ang gobyerno alang sa edukasyon, panginabuhian, ug kahimsog, dili gihapon kini mahimong hingpit nga epektibo kung walay kooperasyon gikan sa pamilya, eskwelahan, simbahan, ug komunidad.
Gipasabot ni Tigo, nga ang teenage pregnancy usa sa dakong hinungdan nga nagpadayon ang siklo sa kapobrehon sa daghang pamilya.
Daghang kabatan-onan ang mapugos sa pag-undang sa pag-eskwela ug sayong pag-atubang sa responsibilidad nga dili pa andam, nga makaapekto sa ilang kaugmaon ug kahimtang sa kinabuhi.
Tungod niini, gi-awhag ni Tigo ang mga ginikanan nga mahimong mas mabinantayon sa paggiya sa ilang mga anak samtang gihangyo usab ang mga kabatan-onan nga unahon ang edukasyon ug likayan ang mga desisyon nga mahimong hinungdan sa kalisod sa umaabot nga panahon.
