Natala ang unang kaso sa bird flu o avian influenza sa usa ka polar bear sa Europe human makumpirmar ang H5N5 strain sa Arctic region sa Norway. Sumala sa Norwegian Veterinary Institute, nakit-an niadtong Mayo ang patayng lawas sa usa ka lalaking polar bear ug usa ka walrus sa Svalbard region nga duol sa North Pole.
Sa gihimong laboratory testing, nagpositibo sa H5N5 variant sa bird flu ang samples gikan sa duha ka hayop. Nagpahimangno ang mga eksperto nga nagkadaghan na ang kaso sa avian influenza sa mga mammal sa Europe ug padayon usab nga nagkalapad ang pagkatap niini ngadto sa Arctic region.
Gibutyag usab sa mga otoridad sa Svalbard nga posibleng bird flu ang hinungdan sa kamatayon sa polar bear ug walrus base sa nakuhang brain samples.
Base sa datos sa World Organisation for Animal Health (WOAH), mokabat sa 140 milyon ka mga hayop sa halos 70 ka nasud ang naapektuhan sa avian influenza gikan Enero 2025 hangtod Marso 2026.
Nagpabilin usab ang kabalaka sa mga eksperto tungod sa posibleng epekto niini sa wildlife ug sa posibilidad nga makatakod usab sa tawo.
Photo Courtesy:wikipedia/ Norway blessed with Nature
